شلال عتم الليل / للأستاذ علي الحاج /
شلال عتم الليل عنو ما فرق
يا شعرها المنشور فوق تيابها
وعلم خيالو امس مطرح ما مرق
نفض جناحو الكحل فوق اهدابها
وقعت سﻻل الضو والصبح اندلق
عالمرمر المسكوب فوق اعبابها
بحر الغوى بعيونها اوعى الغرق
ترمي سهام الموت من نشابها
والورد لون الورد من خدا سرق
والياسمين العطر من لبﻻبها
وشفافها العناب سبحان الخلق
عناب تعصر خمر من عنابها
فيها جمر ولعان بعدو ما احترق
فيها خمر والشهد طعم رضابها
والعنق حامل شمس مثﻻما انخلق
طلت على الويس آب من محرابها
فلقة قمر والبدر عن وجها انفلق
كل السعادة بتمتلك اسبابها
والصبح نور الصبح عن صدرا شرق
يسبي عقول الناس من البابها
هونيك درب النحل عامل مفترق
بين الكرز والتوت فوق اهضابها
بعدو صغير التوت دم اللي سلق
ما علمش مظبوط تحت نقابها
وتسابقوا النسمات ع شم الحبق
والياسين العطر غلة غابها
فرفش خيال الشعر عندي وانجلق
واتغلغل المأزوع تحت تيابها
وتفلفل الممنوع ت زخوا العرق
من لمعة البلور فوق ركابها
ولعان قلبوا ظل ت قلبوا احترق
ت يكشف المستور خلف ابوابها
مشغول بالو وصار في عندو قلق
وقعان وقعة ما حسبش حسابها
والعشق طفل صغير بعدو ما فرق
انو اﻻفاعي السم في انيابها
ماذاق بالأوهام شوطعم الغرق
مين اللي رد السشمس بعد غيابها
قاعد لحالو يكتب ويمحي ورق
يحلم بانو يكون من احبابها
ناسي بانو الحلم عمرو ما صدق
ما حدا رد الشمس بعد غيابها
ناطر طلوع الضو والصبح انسرق
ناطر الحلوي تعود تفتح بابها
مسكين قاعد يكتب ويمحي ورق
يكتب ويمحي بالمحبة كتابها
ويبكي نصيبو وكيف هالعمر انسلق
يلعن حياتو واخت ياللي جابهاك
تعليقات
إرسال تعليق